liewe_heksie
Rubrieke - André le Roux

Afstandbeheer

In gewone Afrikaans ook bekend as: Die Remout (dit eindig tog nes daardie ander mooi Afrikaanse woord, “hawermout”).

Vroue het al begin dink mans weet nie hulle kan van kanaal verander deur ’n knoppie op die TV self te druk nie. Mans weet dit wel, hulle is net nie heeltemal seker wat daardie op- en af-pyltjies beteken nie. Maar die groot ding is: Dis nié soos ’n TV veronderstel is om te werk nie. ’n Mens is tog nie veronderstel om OP te staan om van kanaal te verander nie. Daarvoor is daar mos …

Die Remout. Sonder Die Remout is ’n TV-stel betreklik nutteloos vir ’n man. Daarom vat jy nie aan ’n man se remout nie, nooit nie. Buitendien, jy kan dit laat val! Dis so goed jy laat krimp ’n trooskombers in die tuimeldroër. (Die Remout ís ’n trooskombers, verstaan ’n vrou dit dan nie?)

“Het jy Die Remout gesien?”

Sy het nie.

“Nou’s dit weg!” Die uitroepteken is om pure paniek aan te dui.

“Dis nie nodig om te hiperventileer nie,” sê sy. “Hier’s die ding onder die kussing op die bank.” (Verbeel jou, die ding …) Of tussen ’n hoop tydskrifte op die koffietafel.

“Nou hoekom is dit nie op sy plek nie?!” Die uitroepteken is om pure verligting aan te dui.

Jy kan terugsit en ontspan. Die Remout word ’n verlengde wysvinger in jou hand. Jy voel volkome in beheer, hop moeiteloos van die een kanaal na die ander, flip-flap vorentoe en agtertoe (jy eindig gewoonlik by die kanaal waar jy begin het).

En jy’s heeltemal te vinnig vir haar, sy wou nog kyk, toe kyk sy nie meer nie. Dit irriteer enige vrou tot raserny. Daar’s boonop ’n remout vir alles – die CD-speler, die videospeler, die DVD, M-Net.

“Kry ’n mens nie net een afstandbeheer-ding vir alles nie?” sug sy. Jy kry, maar sê nou daardie Een Remout raak weg? Dan sít jy. (Omdat jy moet opstaan.)

“En hoekom moet daar so baie knoppies wees?” Ha! Dis omdat die meeste vroue nie remotely weet hoe Die Remout werk nie.

“Daar’s iets verkeerd met die TV,” sê sy. “Daar’s net niks!” terwyl sy die aan-knoppie herhaaldelik druk. “Net die rooi liggie links onder brand.”

Dit pla jou nie veel nie, want daar is niks waarna jy op die oomblik wil kyk nie.

7de Laan gaan nou-nou begin!” Jy bespeur verskillende emosies in haar stem: Verbasing, ongeduld, teleurstelling, vrees en tegnologiese ongeletterdheid. Jy skakel die TV aan by Die Remout, waar iemand dit afgesit het.

Dit werk só: Binne-in is eenvoudig ’n bord van veselglas met dun koperdraadjies – ’n geïntegreerde stroombaan bekend as ’n chip. (“Dis ’n skyfie op Afrikaans,” tjip sy in.) Daar’s ’n infrarooi diode, transistors, resonator, resistors en kapasitators (sy weet nie wat dit op Afrikaans is nie = kondensator) en battery-kontakte. As jy dus ’n knoppie druk, maak jy ’n konneksie in die stroombaan, wat opgetel word deur die skyfie (of tjip), wat ’n sein soos Morsekode uitstuur na die transistors, wat dit versterk en aanstuur na die diode, wat dit omsit in infrarooi lig, wat opgevang word deur ‘n sensor in jou TV – wat dan die kanaal verander soos dit moet.

Verstaan jy? Sy kyk jou aan asof jy nog nooit elektronies aangelê was nie. (Dis als daar by howstuffworks.com)

“En het jy geweet?” vra jy. “’n Mens kry deesdae sowaar horlosies met ’n ingeboude remout. Maar die heel beste is ’n remout wat jy met jou stem kan aktiveer. Jy sê net: ‘Gaan na kanaal Soveel’ (Fashion TV) en siedaar die modelle. Of jy sê: ‘Gaan na SuperSport op Ellispark en terwyl jy daar is, sê sommer vir die ref hy’s besig om droog te maak.’”

Sy raak sowaar aan die slaap teen jou skouer voor die TV terwyl jy nog met haar praat en terselfdertyd kyk of daar nie iets op Animal Planet is nie.

“Kan ek maar aan jou remout vat?” vra sy skielik, half deur die slaap.

Jy skrik so groot, jy verander sommer van kanaal