Lewe + Liefdes

Top-5: Oor troebel lewens

Die woordeboek beskryf troebel as volg: moeilikheid, wederwaardigheid, onlus, beroering, wanorde, onhelder, onklaar, onsuiwer, modderig, vuil. Hoe jy die woord gaan inspan, bepaal natuurlik watter een van hierdie betekenisse van toepassing gaan wees. As jy na vandeesweek se Top-5 kyk, sal een of meer van die betekenisse gebruik kan word by elkeen van die boeke. Die verhale gaan oor mense wat ‘n beroering in hul lewens ervaar, waarvan gebeure onsuiwer is. Snaaks dat moeilikheid en wanorde in mense se lewens altyd boeiende verhale oplewer. Meer nog, ons as leser is gefassineer daardeur!

Onthou om ons elektroniese boekwinkel op kalahari.com te besoek om van die boeke teen afslagpryse te bestel.

Die Jakkalsdans, François Loots (Umuzi, R170)

Hierdie briljante boek vertel die verhaal van Mannetjies Steyn, die eienaar van die Algemene Handelaar op Prieska, sy vrou Aletta, en hul aangenome seun, Jopie. Die leser word op ‘n reis geneem deur hulle 1974-kleindorpse bestaan met die alomteenwoordige “Blou Dood” afkomstig van die asbesmyne in die omgewing. Jy beleef saam met Jopie sy wroeging omdat hy anders as ander 17-jarige seuns is; Aletta se lewensmoegheid en misnoeë met Mannetjies en die dorp, en Mannetjies se toenemende bewuswording van Rotman. Die leser vind uit wie Rotman is en wat die jakkalsdans is. 

Alhoewel dit nie ligte leeswerk is nie is dit ‘n baie slim boek wat beslis ‘n tweede keer se lees regverdig. – Retha Burger

Deeper than Colour

Deeper than colour, James Clelland (Jacana, R130,95)

Angus Smith is ‘n argitek, ‘n oud-recce met post-traumatiese stressiekte. Hy’s ook die eggenoot van Di, die ma van sy twee stiefkinders. Dis van die eerste sin af duidelik dat Smith depressief is en onder geweldige druk leef, soos ook blyk uit wat ander van hom vertel. Sy verduideliking van oë wat dieper is as kleur, dui sy somberheid aan. Die boek is baie eerlik geskryf en rou emosies word eg uitgebeeld.

Die verteller word afgewissel en sy eerlikheid en openheid kom in die gedrang, wanneer hy vertel van sy verhouding met Marcella.

Die verhaal raak meer verwikkeld wanneer dit duidelik word dat sy ma ook glad nie is wie Angus dink sy is nie.

Smith onderdruk feitlik alle emosies, en sy woedende optrede in die sekuriteitswinkel laat die leser saam met die beangste werknemer vir sy gewelddadigheid skrik.

Clelland se lekkerlees-skryfstyl bewys dat hy sy EU-literêre prys verdien het. – Mariette Postma

Heart of Tango

Heart of Tango, Elia Barceló, uit Spaans vertaal deur David Frye (Maclehose Press, R169,95)

’n Paar dae voor haar gereëlde huwelik met Berstein, ’n veel ouer Duitse matroos, ontmoet Natalia vir Diego, ’n aantreklike tango-danser. Natalia se pa nooi Diego en sy vriende na die bruilofsfees toe, en só ontstaan ’n liefdesdriehoek tussen Diego, Natalia en Berstein.

Barceló beskryf die kennelike sensualiteit van die tango so goed dat die dans die ware hoofkarakter van die verhaal word en uiteindelik almal se lot dikteer; jare later bring Natalia en Diego se passie vir die tango en hulle tevergeefse liefde vir mekaar twee vreemdelinge in ’n vervalle pakhuis byeen, waar ’n surrealistiese vereniging van tyd, ruimte en karakters plaasvind.

Deur die vernuftige vermenging van historiese feite en fantastiese gegewens, slaag Barceló daarin om die tydsgees van Buenos Aires in die 1920’s op unieke wyse oor te dra – liefhebbers van magiese realisme volgens die Spaanse tradisie (dink aan die skryfwerk van Isabel Allende) sal hierdie roman geniet. – Emsie Viljoen

Alice Bliss

Alice Bliss, Laura Harrington, (Picador, R190)

Die Irakse oorlog en die effek wat dit op ’n Amerikaanse familie het word realisties uitgebeeld in hierdie boek. Alice Bliss se pa, Matt, word Irak toe gestuur na ’n sesweke-opleidingskursus. Hulle neem swaar afskeid van hom, want hulle is ’n baie hegte gesin. Alice neem amper die huishouding oor omdat haar ma, Angie, nie kan regkom sonder Matt nie. Die negejarige Ellie, Alice se sussie, probeer hard om volwasse te wees deur dié hartseer proses. Omdat die boek in dagboek-vorm geskryf is, word hulle bedrywighede byna daagliks beskryf.

Vir ’n 15-jarige is Alice baie selfstandig en dapper. Matt word gewond in ’n skermutseling, gevange geneem en sterf aan sy wonde. Tuis probeer elkeen die tragedie op hulle eie manier verwerk.  Alice, wat besonder na aan haar pa was, sukkel die meeste. Sy dring daarop aan om met van sy take, soos die groentetuin uitlê en sy werkswinkel skoonmaak, aan te hou. Gelukkig is haar boesemvriend, Henry, deurentyd daar vir ondersteuning. – Jenny du Toit

Homemaking for the Down-at-Heart

Homemaking for the Down-at-Heart, Finuala Dowling (Kwela Books, R190)
Die boek speel af oor ’n tydperk van drie jaar. Jy loop die pad saam met Margot, ’n laataand-radio-omroeper. Haar eensaamheid is vatbaar, al deel sy haar huis met ’n hele klomp mense. Jy ervaar ook die stryd waardeur sy moet gaan terwyl sy na haar ma, Zoe, moet kyk wat aan demensie ly. Margot het omtrent ’n mengelmoes van mense wat sy moet hanteer! Zoe se sê-goed is by tye baie snaaks en ander tye absoluut hartverskeurend. Margot se dogter, Pia, is baie fyngevoelig en meer as net ’n bietjie eksentriek, maar dit pas haar goed aangesien sy eendag ’n aktrise wil word.  Die slordige “Mr. Morland” het saam met Zoe by Margot beland. Hy was Zoe se goeie vriendin se seun en het ná haar afsterwe by Zoe aangebly. Die titel van die boek is baie gepas omdat dit ook die titel van ’n boek was wat Zoe in die sewentigerjare geskryf het. Aanhalings uit dié boek kom gereeld voor en elke keer wanneer jy een van die aanhalings lees, besef jy opnuut wat ’n verwoestende effek demensie op die eens amusante, welgesproke Zoe gehad het. Esmé Blackburn