sk1007kwepers01_10_
Verhoudings

My kind: Só bou buitemuurse aktiwiteite jou kind se selfvertroue

* Leierseienskappe en om beter te kommunikeer.
Die student Deline van Ieperen sê: “My redenaar-ervaring het my die selfvertroue gegee om voor die hele skool ’n boodskap te lewer, wat ek gehoop het die leerders sou glo, selfs al was dit ’n ongewilde mening.”

* Integriteit.
Wanneer jou kind deelneem, verteenwoordig sy dikwels haar skool. Só ontwikkel sy integriteit, sê Riana Lighthart, opvoedkundige sielkundige.

* Sosiale vaardighede.
Sy oefen en verfyn daagliks haar interaktiewe vaardighede. Sy voel sy behoort tot ’n groep wat belangstellings deel en waarin sy haarself moet handhaaf, sê dr. Ronel Tarnow, opvoedkundige sielkundige. Sy leer negatiewe groepsdruk hanteer, wat veral vir tieners belangrik is. 

* Sukses én mislukking.
Jou kind leer albei hanteer en om op ’n gesonde manier mee te ding. Woedebuie is uit. Leer haar: ’n Mens wens die wenspan geluk en julle respekteer mekaar, sê Chrismari Herholdt, kliniese sielkundige. Sukses moet met nederigheid gepaard gaan, voeg Deline by. “Herinner jouself dat dit harde werk gekos het.”

Jou kind leer om ná mislukking op te staan, sê Mandie Wagner (29), fotografiese model van Kempton Park, Gauteng. “Sy moenie toelaat dat dit haar onderkry nie. As sy die aktiwiteit geniet, sal sy ook nie soos ’n mislukking voel nie.”

* Krisishantering.
Dis ’n aangeleerde vaardigheid, sê Ronel. Jou kind leer om op haar voete te dink. Cara Rust, student, beaam dit: “Jy moet ’n krisis op die verhoog oplos én dit vinnig doen sodat niemand dit agterkom nie. As jy jou woorde vergeet, moet jy iets opmaak, as jou kostuum skeur, moet jy dit deel van die toneel maak.”

* Waagmoed.
Jou kind leer berekende risiko’s neem. ’n Onvoorbereide toespraak verg byvoorbeeld dat sy buite die boks moet dink. Deline sê: “Daar is ander wat nes jy dink, maar hulle is dalk net te bang om dit te sê.”   

* Spanning.
Al is haar program dol, kan sy onder “vrugbare spanning” soos Ronel dit noem, take met sukses aanpak. Soms moet sy ook “nee” sê of van haar aktiwiteite verminder. “Hoe meer jy het om te doen, hoe beter is jou tydbestuur,” sê Cara. “Jy leer fokus. As jy vandag toets skryf, kan jy nie dink aan wat vanaand op die verhoog gaan gebeur nie.” 

* Uithouvermoë, toewyding, dissipline en harde werk is die grondslag vir werketiek.
Cara sê sy het geleer om nooit op te gee nie. Daar was ’n stadium dat sy net bronsmedaljes op kunstefeeste gewen het.

“Ek was later moedeloos, want dit was harde werk,” sê sy. Maar sy het vasgebyt totdat sy ’n jaar later goue medaljes en ere-kleure in drama gekry het. “Die deurdruk en selfdissipline – soos dat jy moet werk al is jy moeg – help my vandag steeds elke dag op universiteit.”

* Prioriteite.
As jou kind skoolwerk, ontspanning en ’n aktiwiteit soos modelwerk moet balanseer, leer sy prioritiseer, en om op te maak as sy een moes afskeep, sê Mandie.

LEES OOK: GEE JOU KIND SELFVERTROUE

  • Ruben

    Ek soek aktiwiteite vir my kind