Dave Pepler blog, Snuf in die neus: Sewe doodsondes

Deur Dave Pepler, SARIE - April 2011

Dave Pepler blog, Snuf in die neus: Sewe doodsondes Foto’s: verskaf

Van die sewe doodsondes weet ek slegs hoe wellus ruik. My neus vertel my dit het 'n effe olierige reuk, byna soos vars botter, met ‘n ondertoon van gekneusde gras.

Ek het geen idee waar ek hieraan kom nie, maar ek weet verseker dat dit vroeg geplant is en diep begrawe is in my brein. Miskien is dít die oorsprong van fetisjisme, ‘n oorrompelende emosie wat aan ‘n reuk, kleur of tekstuur gekoppel word.  ‘n Interessante feit is dat rubber-fetisjisme onbekend was voor die Tweede Wêreldoorlog en bes moontlik ontstaan het toe Londenaars in moltrein-tonnels moes skuil teen die verwoestende aanvalle van die Luftwaffe.Warm en bedompig het mense langs mekaar geslaap met hul rubber-gasmaskers om die nek – selfs in die teenwoordigheid van pyn en die dood funksioneer die libido onbelemmerd.

Die vraag is nou: kan ‘n emosie toegeskryf word aan ‘n reuk of geur?Ja, tog.Hier het ons te make met sinestesia, ‘n vreemde neurologiese kondisie.Uit die oer-Grieks σύν (tesame) en αἴσθησις (sensasie) is dit ‘n neurologiese kondisie waar ‘n stimulus in een sensoriese baan lei na ‘n outomatiese en onwillekeurige ondervinding in ‘n tweede sensoriese baan.Mense met hierdie kondisie kan kleur sien of reuke hoor, byvoorbeeld.Kruis-metafore kom ook algemeen voor in taalgebruik, waar ons ‘n wind as bitter kan beskryf en ‘n uur as blou.

Onlangs is ek die groot eer aangedoen om deel te neem aan die Toffie Pop Culture Festival and design conference in Kaapstad.Moedswillig en aweregs, is hierdie fees ‘n forum vir modern en uitdagende ontwerp, en ook tendense in huidige denke oor kultuur.Kyk mens na die program. is dit uiters ambisieus en dek velde soos elektronika, webontwerp, musiek en vele meer dissiplines.Ek dink dis uniek in Afrika, miskien selfs in die wêreld en dien as kruisbestuiwing vir spitsdenkers in die visuele velde.Peet Pienaar is die kreatiewe krag hieragter en mens moet hom gelukwens met sy dapperheid en visie.

Ek moes lank dink aan hoe ek hierdie idee wou aanbied, en het toe besluit om dit vir beide mans en vroue voor te stel met my gekose parfuums aan papier-toetsstrokies.Twee rye, een vir mans en een vir dames, word deur gestileerde maskers voorgestel, en elke sonde met ‘n proefbuis en papierstrokie.Daarna laat ek dit oor aan die ruiker se verbeelding, want net hier kan ons die verborge assosiasies vorm met gebeure uit ons verlede.Uiteraard is hierdie oefening persoonlik en elke besoeker moet sy eie reukbeelde vorm.

Doodsondes?In Spreuke 6:16-19 lees mens: "Die vrees van die Here is om te haat wat sleg is. "Hierdie ses dinge haat die Here en sewe is vir Sy siel 'n gruwel - trotse oë; 'n leuenagtige tong en hande wat onskuldige bloed vergiet; 'n hart wat onheilsplanne geraam, voete wat haastig na die kwaad toe loop, een wat as valse getuie leuens uitstrooi en tussen broers tweedrag saai.”Vir my doeleindes lees dit: toorn, gierigheid, luiheid, trots, wellus, afguns en vraatsug.Demone soos Lucifer, Mammon, Asmodeus en Leviathan word ook aan hierdie sondes gekoppel, en veral Peter Binsfeld het in 1589 ellelange opstelle daaroor geskryf.

Sal ons met die mans (♂) begin en, een-vir-een, deur hul sondes ruik?

♂ Toorn          Rien van Etat Libre d’Orange beskikbaar by Metropolitain Cosmetics

Rien (niks) is alles behalwe niks.Bitter en metaalskoon is dit ‘n leer-liefhebber se droom.Dit herinner miskien aan die hemelse Bandit van Robert Piguet, maar is nog skoner, nog gevaarliker en sê op ‘n afstand: “Moenie met my sukkel nie.”

♂ Gierigheid   Antaeus van Chanel beskikbaar by Red Square

In die vroeë tagtigs het ek my eerste bottel Antaeus gekoop en dit oombliklik berou.Dit was kragtig, effete en eerder vir dames bestem.Maar een ding was seker, dit was solied en verruklik met roos en jasmyn in die hart.Vandag ruik dit mak teen sommige nuwe skepsels, maar dis ongetwyfeld deur die jare beproef as klassiek.Dit ruik ryk.

♂ Luiheid        Antihéros Etat Libre d’Orange beskikbaar by Metropolitain Cosmetics

Ek hou niks van laventel-parfuums nie, want dit ruik altyd “gekook”.Stoom-distillasie word gebruik om die olie af te dryf en die produk is dan na my neus bederf.Net nou en dan kry mens olie van uitstaande gehalte en Antihéros is ‘n voorbeeld hiervan.Êrens in die boonste note skuil ‘n tintelende lemoengeur en dan hou dit, onderuit en suiwer - laventel op die warm somerwind teen die heuwels van Grasse.

♂ Trots           Cuir de Russie van Chanel se Les Exclusives-reeks  beskikbaar by Red Square

Ken jy daardie leerbaadjies wat in ‘n laslappie-patroon aan mekaar gestik is?As ‘n naat eers lostrek, is dit soos ‘n outydse sykous, en die hele ding val, roesbruin, uitmekaar.Maar miskien ken jy ook ‘n Napa-leerbaadjie uit Firenze.So ver uitmekaar is Chanel se goddelike Cuir de Russie van enige ander leer-parfuum.Die hart bestaan uit Russiese berke-sap afgekook tot ‘n donker teer en dit fluister: “Ek weet, ek weet.........”

♂ Wellus         Vulva van Vivaeros

Vivaeros se webtuiste waarsku luid: “Vulva is not a perfume!”Ek stem volmondig saam.Hulle beweer dat dit ruik na die vaginale afskeiding van ‘n vrou, wagtend op haar minnaar.Soos die Engelse sou sê: “Its rather a tall order.”  Die volledige vaginale afskeiding van primate bevat meer as 190 elemente, maar word gedomineer deur glas-asynsuur en botter-vette.Gemeet aan die ware Jakob, vermoed ek dat Vulva daarin slaag.As sommige mense van njabbas hou, en ander van bloukaas, dan is daar dalk ‘n nismark vir Vulva.Laat dié een my maar verbygaan.

♂ Afguns        Garage van Comme des Garcons beskikbaar by Church

Garage is skaamteloos en suiwer sinteties.  “Trashy” is eintlik die woord, want die verpakking is deursigtig met ‘n swart sak sigbaar daarbinne.Dit bevat aldiëde, petrol, leer en plastiek, met vreemde hout en grasgeure daaronder.Dit ruik na die droom van ‘n jong man, begeesterd deur motors: “My pa se een is groter as joune.....”

♂ Vraatsug     Fat Electrician van Etat Libre d’Orange beskikbaar by Metropolitain Cosmetics

Ek is gek oor Fat Electrician se etiket.

Mens benader dié geur versigtig met hierdie beeld voor jou.Maak jou oë toe en ruik – gras, grond, effe muwwerigheid, rooiwyn en muskus.Dit werk bo alle verwagting in en straal eenvoudig kwaliteit uit.Spuit bietjie aan en gaan lê voor ‘n kaggel met ‘n groot gemmerkat op jou bors.

En dan die dames (♀)

♀ Toorn          Bandit van Robert Piguet beskikbaar by Metropolitain Cosmetics

As ek Bandit aan ‘n vrou ruik (en dít gebeur nie aldag nie), loop ek wyd om haar.Slegs iemand met volkome vertroue en ‘n onwrikbare sin vir self sal waag om Bandit te dra.Dis brutaal en suiwer – leer in sy suiwerste inkarnasie, trots en afgesonder.

♀ Gierigheid   Vent Vert van Balmain beskikbaar oorsee

Sou jy aalwynsap kan ruik, dan sou Vent Vert só bitter geruik het.Galbanum is die hars wat dit so groen en bitter maak en as ek ‘n geur moes toeskryf aan iemand soos Donald Trump se nuutste vrou, sal dit dié een wees.

♀ Luiheid        Jasmin et Cigarette van Etat Libre d’Orange beskikbaar by Metropolitain Cosmetics

"Instantly recognisable, taking long puffs on her cigarette and exhaling slowly, a veritable dragon-queen," het die Mail on Sunday op 2 Julie 2006 van Bette Davis gesê.Die laaste van die onbekeerlike rokers en salondames soos Colette, Bette Davis, Tallulah Bankhead, Catherine Deneuve, en Joni Mitchell verpersoonlik hierdie parfuum.Dit ruik na laatnag, dit ruik na loom, dit ruik na genoegdoening.

♀ Trots           Opium van Yves St Laurent beskikbaar by Red Square

As jy kaneel, peper, lemoen en pimento strooi op ‘n middelvlak van angelier, jasmyn, roos en Ylang-Ylang en dié spul pak op ‘n basis van vanielje, benzoin en patsjoeli, kry jy ‘n wegholreaksie in ‘n reaktor.Maar as jy Yves St Laurent is, skep jy een van die parfuum-wêreld se mees dramatiese en suksesvolle parfuums ooit.Opium het die parameters van sogenaamde “Oriëntale” parfuums bepaal.Jy moet trots wees om dit te dra anders word jy eenvoudig Opium se skaduwee.

♀ Wellus         Sécrétions Magnifiques van Etat Libre d’Orange beskikbaar by Metropolitain Cosmetics

Etienne de Swardt het sy loopbaan gevestig en sy naam in die geskiedenis van parfuum gevestig met hierdie diep ontstellende geur.Akkoorde van melk en van bloed, iris en sandelhout los mens sprakeloos as jy dit die eerste keer ruik.Om eerlik te wees ruik dit vir my na semen (die melk-akkoord vermoed ek) en na ‘n nat stort.Ongelukkig dwing die vulgêre etiket mens se gedagtes in een rigting, maar vergeet daarvan en ruik dit met dissipline.‘n Meesterstuk.


Verwante artikels

Kommentaar

  • Diana het gesê:

    Het dié stuk skryfwerk nou baie geniet. Hou v al die "navrosing"... ruik dit met dissipline... :-)....wow!

    7de Apr. 2011, 13:47

  • Diana het gesê:

    Het dié stuk skryfwerk nou baie geniet. Hou v al die "navrosing"... ruik dit met dissipline... :-)....wow!

    7de Apr. 2011, 13:47

  • Isabella Niehaus het gesê:

    Dankie Dave!! Wow ek geniet altyd jou stories en al die wonderlike inligting!! Dit voel sommer of mens deur 'n enorme parfuum woud gestap het!!

    7de Apr. 2011, 11:05