Tanya O'Connor blog: "Wanneer dinge gebeur waarvan ek nie hou nie" (Gesprekke met EK)

Deur Tanya O'Connor, SARIE - Oktober 2010

Tanya O'Connor blog: "Wanneer dinge gebeur waarvan ek nie hou nie" (Gesprekke met EK) Galery

Laasnag het ek 'n hele beker water bo-oor my handsak omgekeer.

My notaboek het bo-op gelê en my notas is nou net sulke blertse donkerpienk ink. (Ek met pienk ink skryf? Nog 'n Gesprek met Ek vir 'n ander dag!)
 
Ek was glad nie beïndruk met myself nie, "Tanya jy het mos geweet dit gaan gebeur, hoekom het jy die water daar gesit?" Maar dit het gebeur en my notas is daarmee heen. Deesdae moet ek als neerskryf, as 'n gedagte in my kop posvat, moet ek dit êrens aanteken anders is dit vir altyd weg.
 
Ek hou nie daarvan nie, maar dit gebeur tog met my . . .
 
Rory is gebore op die 28ste September, met vrugwater-ontsteking. Ek kon hom nie vashou nie, hom net vinnig sien voordat hy na die intensiewe sorg gehaas is. Ek kon nie opstaan vir omtrent twee dae nie.
 
Ek het nie daarvan gehou nie, maar dit het gebeur . . .
 
Sy pediater kom die kamer ingestap met 'n leêr in haar hande, sy kyk af, kan sien sy wil my nie eintlik vertel wat sy my moet vertel nie. "Mev O'Connor, Rory gaan nog in die ICU moet bly, sy CRP-telling is nog baie hoog, dit is 90. Hy kan nie Woensdag huis toe gaan nie." Ek vra vir hoe lank dink sy? "Mev., dit is moeilik om te sê met premature babas, totdat hy gesond is." Ek bel my man in trane, ek wou hom soo graag huis toe neem.
 
Ek het nie daarvan gehou nie, maar dit het gebeur. . .
 
So het baie dinge in my lewe gebeur waarvan ek nie gehou het nie. Die beker water was maar 'n kleinigheid, maar dit het my tog beïnvloed. My kind is nou gesond, lê en slaap in sy wiegie, hy groei voor my oë.  
 
Wat het ek gedoen met dit waarvan ek nie hou nie?
 
Ek kan nie die lewe in trurat sit nie, ek kan nie my ma, ouma, pa en man weer terugbring lewe toe nie. Ek kan nie my kinderlewe uitvee en weer oorteken nie . . . Ek kan nie die water weer in die glas terugkry nie . . . Ek kan nie my neus weer laat ruik nie!
 
Maar ek kan wel nuwe notas maak, ek kan beter idees neerskryf, ek kan dieper gaan dink en op 'n ander manier vertel wat ek wil sê as wat in my notas was. Ek kan na 'n blom kyk en my verbeel hoe dit ruik, ek kan lekker lag wanneer ek maar moet voel of Rory se doek 'n geurtjie het in plaas van ruik of dit het.
 
Dit wat in my of jou lewe gebeur wat ons seermaak, ontstel, ons hele dag deurmekaar maak, kan ons aanspoor om anders te dink. Om ons meer te LAAT, om 'n plan te kry om onsself te help, om dinge beter te maak. Ek kon nie Rory uit die intensiewe eenheid help nie, maar ek kon myself help met my hartseer. Dit was moeilik om vir myself te sê, hy word beter na gekyk in die hospitaal as by die huis, al is dit die reine waarheid. Ek wou hom vashou, ek wou sy doeke omruil en ek wou in die nag vir hom opstaan, maar ek kon nie.  
 
Ek wou nie grootword met 'n ma met depressie nie, ek wou nie grootword soos ek grootgeword het nie, maar ek het. En al wat ek NOU daaraan kan doen, is om vorentoe te kyk en te aanvaar dit het gebeur. Wat tel, is hoe ek hier en nou se lewe aanpak.
 
Die verlede het my baie geleer, my beïnvloed om te dink. Ek het selde die woord EK gebruik, want ek het nie in myself geglo nie. Ek kon nie eens 'n sakdoek stryk of 'n eier bak nie.  Nou bak ek brood en maak 'n liplekker pizza. Ek dans 'n riel elke keer wanneer ek 'n baksel muffins uit die oond haal en hulle is goudbruin gerys.  
 
Ek kon nie in Afrikaans skryf nie, nou skryf ek al vir twee jaar in Afrikaans en my boek is teen einde Oktober beskikbaar.
 
Elke dag is vol oomblikke wat ek wou terugdraai, klein en groot oomblikke. Dit is my besluit wat ek daarmee doen, dink ek aan die terugdraai of dink ek aan vorentoe beur?

Verwante artikels

Kommentaar

  • appliance repair Glendale het gesê:

    Moeten blijven testen van mijn blog. Niet werkt zoals ik wil dat nog niet. Bedankt voor het thema. Misschien is dit krijgt mij er beter uitzien.

    27ste Apr. 2011, 13:41

  • Isabella Niehaus het gesê:

    Daars so wonnerlike ding...ek kan nie presiese woorde onthou: in live it is not how great you lived or how much you loved but how well you learnt to let go! (sommer my eie verkorte weergawe.) Jy laat mens lekker sit en dink hier op 'n Maandagaand. Groot druk vanaf die weskus. Bella.

    18de Okt. 2010, 20:13