Tanya O'Connor blog: "Wat sal jy koop?"

Deur Tanya O'Connor, SARIE - Oktober 2010

Tanya O'Connor blog: "Wat sal jy koop?" Galery

Wat sou jy koop as jy nou, 2.07 nm, 28 September 2010 ( . . . . .vul jou eie datum en tyd in) soveel geld het dat jy nie al die nulle op jou bankstaat sou kon tel nie?

My kind bring soveel vrae in my binneste na vore, soos juis hierdie een.  Ek het een oggend gesit voor die bank, het so pas 'n staat gaan trek. Die vorige dag het my man 'n aansienlike bedrag in my rekening inbetaal, ons het besluit om die Yamaha MT-01 te koop, kontant te koop en ek sou die tjek daarvoor uitskryf.  
Ek het na die klein papiertjie gekyk en gewonder, ook diep gedink, wat sou ek nou wou gaan koop met daardie geld? Ek het besluit om 'n antwoord te kry voor ek weer my motor sou aanskakel en uiteindelik die fiets gaan betaal.  

Ek het 'n goeie 15 minute so gesit, myself gedwing om te dink.  Skoene, 'n kar, klere, juwele? Ek het regtig aan alles gedink en my antwoord was NIKS! Ek het niks nodig gehad nie, nie toe nie en ook nie nou nie.  Wel, niks wat geld kan koop nie.  Ek is elke dag omring met liefde en vrede, ek put elke dag soveel uit die lewe waaraan daar geen randwaarde geheg kan word nie.  

Skoonma bel my, ons is juis op pad om Kaap toe te trek en sy rig die huis vir ons in. In een van die kamers is 'n jonkmanskas en die persoon wat na oortollige meubels kom kyk het, het juis die kas raakgesien.  Daar is net vyf daarvan gemaak, hy het haar 'n sessyferbedrag aangebied vir die kas.  Sy het dit nie aanvaar nie.  Ek vra haar hoekom, haar antwoord: "My kind, hoe kan ma randwaarde heg aan wat al honderde jare in die familie is? Dit is in elke geval Rory se kas."

Net so is daar ook in haar kelder wyn wat sy met gholf gewen het, sy weet ek is baie lief vir Nederburg se Cabernet Sauvignon. En sy het al 'n paar bottels uit 1983 vir my oopgemaak. Ek geniet elke tandvol glinsterende rooi. Aan die begin wou ek nie hê sy moet dit oopmaak nie, maar sy wou met 'n "dis mos daar om te geniet, my kind"!

Daar is soveel skatte rondom ons, wat verniet is, maar ook so kosbaar dat daar geen randwaarde aan geheg kan word nie.  

Dink daaraan . . . môre as jy jou oe oopmaak, jy is hier, jy leef, jy kan sê Hallo, Lewe!

Verwante artikels

Kommentaar