Grimering in 10 stappe
Foto’s: Verskaf Galery
Die Amerikaanse grimeerkunstenaar Bobbi Brown maak lysies vir alles in haar lewe. Selfs haar daaglikse grimering! Volg haar 10 stappe vir 'n mooi, afgeronde voorkoms.
Stap 1: Verbloemer
Gebruik 'n tikkie verbloemer onder jou oë om van donker kringe ontslae te raak.
Stap 2: Onderlaag
Kies 'n skakering wat die naaste aan jou veltoon is, en wend dit oor jou hele gesig aan. Fokus veral op die dele om die neus en mond waar rooiheid voorkom.
Stap 3: Poeier
Tik 'n gesigpoeier oor jou hele gesig om die onderlaag en verbloemer die hele dag te laat hou.
Stap 4: Wenkbroue
Gebruik 'n borseltjie om jou wenkbroue netjies te maak, en 'n oogskadu so na as moontlik aan jou haarkleur om dit in te vul en definisie te gee.
Stap 5: Oogskadu
Sit 'n ligte kleur (soos ivoor) oor jou hele oog, 'n mediumkleur (soos ligbruin) oor jou ooglid, en gebruik 'n donker kleur (soos steenkool of swart) om jou oë te omlyn.
Stap 6: Oogomlyner
Wend 'n donker oogskadu teen jou onderste wimpers aan. Gebruik dan 'n oogomlyner teenaan jou boonste en onderste wimpers.
Stap 7: Maskara
Sit twee of drie lae maskara aan om jou wimpers definisie te gee. Onthou om elke laag eers te laat droog word.
Stap 8: Blosser
Kies twee skakerings: een wat pas by jou natuurlike kleur wanneer jy bloos, en 'n helderder een vir 'n tikkie kleur. Glimlag en wend die natuurlike blosser aan jou wange en dan opwaarts na jou haarlyn. Tik die helderder kleur op die appels van jou wange.
Stap 9: Lipstiffie
Kies jou gunsteling-kleur en wend dit net so aan, of gebruik 'n borseltjie vir 'n ligter voorkoms.
Stap 10: Lipomlyner
Gebruik 'n romerige lipomlyner nadat jy lipstiffie aangesit het vir natuurlike definisie vir jou lippe.
Volg dié stappe as jy min tyd het:
Stap 1: Verbloemer onder die oë.
Stap 2: Onderlaag om jou neus en mond.
Stap 3: Blosser op jou wange.
Stap 4: Lipglans of lipstiffie.
*Kyk uit vir die eerste Bobbi Brown-parfuum-afdeling wat onlangs in die Red Square in Fourways oopgemaak het.
Verwante artikels
-
Definisie vir jou oë
SARIE - Julie 2009
Bobbi Brown, Amerikaanse grimeer-ghoeroe, spog met haar eie grimeerreeks en stel dit dikwels eers by modeweke op die proef voordat sy dit bemark.
-
Grimeerkunsies vir jou mooiste voorkoms
SARIE Junie 2011
Nog altyd gewens jy kan presies leer hoe om daardie klein foutjies te verdoesel? Steek kers op by een van die grimeerhuis Bobbi Brown se internasionale grimeerkunstenaars, Eduardo Ferreira.
-
Grimering van dag na nag in 'n japtrap
SARIE Maart 2012
By die kantoor of huis is jou grimering gewoonlik neutraal en eenvoudig, maar vir ’n aand uit behoort dit jou sexy te laat voel.
Kommentaar
Norma van rooyen het gesê:
Ek wil so graag leer hoe om oog omlyner en vals oog wimpers aan te wend.
3de Nov. 2011, 13:41