FOTO Instagram /

Het jy gehoor?

Onthou jy nog die Hanson-broers?

In 1997 het die Hanson-broers (Isaac, Taylor, Zac) hul treffer “MMMBop” gesing. Die liedjie was so gewild dat dit in 27 lande nommer 1 was. Toe was hulle onderskeidelik 17, 14 en 12 jaar oud. Nou 20 jaar later is die Hanson-broers getroud met kinders.

Onthou jy nog hul treffer?

Dís hoe die Hanson-broers nou lyk:

SKERMGREEP YouTube

Kyk net hoe klink hul 90’s-treffer nou:

FOTO Instagram / @chrissyteigen

Modestories

’n Nuwe top, onder ’n minuut

Die deursigtige trend is gróót, maar het jy geweet jy kan vir jou ’n top van sykouse maak? Ja, wees op trend deur jou sykouse te omskep. Dit is rêrig so maklik soos 1…2…3…

Bekendes soos Khloé Kardashian, Chrissy Teigen, Kim Kardashian en Kylie Jenner is gaande oor deursigtig, maar gelukkig hoef ons nie duisende rande uit te gee om dié trend te volg nie!

A photo posted by Khloé (@khloekardashian) on

A photo posted by Kylie (@kyliejenner) on

Jy benodig

♥ Sykouse

ONTHOU: jy kan enige kleur, patroon, kant- en selfs visnet-kouse gebruik

♥ Skêr

Kyk hier hoe om vir jou ’n núwe top te maak:

Gaan haal jou sykouse en skêr en skep vir jou ’n nuwe top vir die naweek.

Dakota Johnson FOTO: Mark Suban / ©A.M.P.A.S.

Ons hou van

Aktrise Dakota Johnson se maskara-geheim

Ons is mal daaroor as bekendes hul slim en interessante skoonheidsgeheime deel!

Die Amerikaanse aktrise Dakota Johnson, bekend vir haar rol in die 50 Shades of Grey-flieks, het onlangs in ’n onderhoud met die tydskrif Glamour ’n maskara-truuk gedeel wat sy by haar ouma, die veteraan-aktrise Tippi Hedren, geleer het.

Guess who

A post shared by MELANIE (@melanie_griffith57) on

In die onderhoud vertel Dakota dat haar ouma eendag gesien het hoe sy maskara aanwend. “Sy sê toe vir my as jy ’n grimeerspieëltjie laag op jou skoot hou en die maskara aanwend terwyl jy afkyk, sal jou wimpers van wortel tot punt bedek word.”

Dakota, Mama and me. 3 generations of actress’s. Vanity Fair is so sweet to have us

A post shared by MELANIE (@melanie_griffith57) on

Ons het dié wenk probeer en dit werk inderdaad! Ons dink dis ’n slim truuk om te gebruik wanneer jy vinnig deur die dag jou maskara moet aanwend of opknap.

Dakota kom omtrent uit ’n sterbelaaide familie uit. Haar pa is die akteur en sanger Don Johnson en haar ma die aktrise Melanie Griffith. Melanie se tweede huwelik is met die Spaanse akteur en sanger, Antonio Banderas. Ouma Tippi (Melanie se ma) was ’n bekende aktrise en model in die 1960’s.

Dakota and Mama photo by Mario Testino 20014 #proudmama # love @mariotestino

A post shared by MELANIE (@melanie_griffith57) on

Dié maskaras is nuut op die rak:

1. Revlon Mega Multiplier Mascara (R169)

Dié formule gee jou wimpers volume en lengte en is boonop waterbestand.

2. Max Factor Excess Volume Extreme Impact Mascara (R210)

Skep eers hope volume met die een borselpunt en maak jou wimpers dan gitswart met die ander borselpunt.

3. L’Oréal Paris False Lash Superstar X Fiber (R200)

’n Wimper-basislaag en maskara in een!

 

4. Elizabeth Arden Lasting Impression Mascara (R365)

Die spiraalvormige borsel van dié maskara sorg dat elke wimperhaartjie individueel bedek word vir definisie.

5. Maybelline The Colossal Big Shot Volum’ Express Mascara (R150)

Net een lagie is nodig vir oë wat wawyd oop lyk.

 

Bronne: www.glamour.com, www.usmagazine.com

Lees nou

Dís hoekom wenkbroue jou belangrikste gelaatstrek is

Kyk! Nuwe, maklike tegniek vir golwende hare

FOTO Michael Le Grange

Gebak

Chiffonkoek met Earl Grey-sjokolade

Sjef Nic van Wyk, beoordelaar van kykNET se Kokkedoor en Kokkedoortjie, onthou sy ouma Lina met ’n koppie Earl Grey-tee en goeie koek. Een van die mooiste koeke is ’n chiffonkoek. Geur witsjokolade met Earl Grey en jy het ’n nostalgiese wenner.

Nic onthou …

Watter vrou het jou kookkuns die meeste beïnvloed?

My ma, Mariaan, ’n spysenier. My pa, Frik, ’n rekenmeester, is mal oor lekker eet en ’n goeie bottel wyn. Ons het in Pretoria grootgeword en my ma het ons altyd aan goeie restaurante blootgestel, maar snaaks genoeg nooit tradisionele boerekos gemaak nie. Haar ma, ouma Lina, het wel. Ek het ook ’n suster en broer. En ons almal hou van kos.

Jou kleintyd-herinneringe aan kos?

My ma wat Earl Grey-tee uit ’n regte koppie drink en koek eet. My ouma Lina se boerekos. Sy is die begin van die jaar oorlede. Ek het eers later in my lewe besef dat ek so baie smake en geure van haar kos kan onthou omdat sy dit so lekker kon maak – aartappels met skaapnek en groenbone met baie witpeper, vars brood met varkvet, kerriesosaties, vars tamaties uit Oupa se tuin . . . kos was belangrik en daar was altyd te veel.

FOTO Michael Le Grange

Herman maak sy weergawe

genoeg vir 1 koek

• 12 ekstragroot eierwitte
• 3 ml sout
• 10 ml kremetart
• 500 g (960 ml) versiersuiker, gesif
• 280 g (500 ml) koekmeel, gesif
• 5 ml vanieljegeursel

Versiersel

• 150 ml melk
• 2 sakkies Earl Grey-tee
• 100 g witsjokolade
• 100 g donkersjokolade

Verhit oond tot 170 °C.  Plaas eierwitte, sout en kremetart in bak van ’n elektriese menger en klits tot sagte punte vorm. Voeg versiersuiker geleidelik by en klits tot blink, stywe mengsel, 5-8 minute. Vou meel en vanielje versigtig in met ’n groot metaallepel. Gooi beslag in ’n chiffonkoekpan van 3 500 ml. Moenie die pan met kleefwerende kossproei spuit of smeer nie, want die koek moet aan die pan vassit om te rys. Plaas in warm oond. Bak vir 40-45 minute of tot toetspen skoon uitkom en koek sponsagtig voel. Haal gaar koek uit oond en plaas pan onderstebo op ’n houtbord sodat die koek kan afkoel. Dis belangrik om die koek onderstebo neer te sit, anders gaan dit platval. Gebruik ’n slaplemmes en sny die koek versigtig van die pan los. Versier so Bring 50 ml van die melk tot kookpunt met die teesakkies en sit plaat af. Laat trek vir ’n paar minute. Druk al die geur uit die teesakkies en haal uit melk. Voeg witsjokolade by en smelt oor baie lae hitte tot gladde mengsel. Verhit res van melk, gooi oor donkersjokolade en roer tot gesmelt. Plaas afgekoelde koek op opdienbord. Gooi donker- en witsjokoladesous gelyk oor koek om ’n marmer-effek te vorm. Sit voor.

FOTO Block & Chisel

Dekorstories

Kyk wie word 30!

Die ikoniese dekorwinkel Block & Chisel word 30. Ons gesels met Lynn McAdam, wat saam met haar man, Sibley, die winkel begin het.

Het jy ooit gedink dat Block & Chisel 30 jaar sou hou?

Ek het nie nooit regtig daaraan gedink nie. Dit wys jou net, tyd vlieg as jy besig is met iets waaroor jy passievol is.

Wat is jou geheim tot sukses?

Aanhou en aanhou.

Wat was vir jou die grootste beloning om in die afgelope 30 jaar dié besigheid te bedryf?

Dat dit so uitgewerk het dat my hele gesin betrokke is by die besigheid, dis vir my heerlik.

As jy weer moet begin, sou jy iets verander het?

Nee ek sou niks wou verander het nie, behalwe dat ek vir ’n paar jaar in Hong Kong sou wou woon en ek sou meer vakansie hou.

Wat inspireer jou die meeste?

Om te reis, interessante winkelvensters te sien, slim interieurplanne, Pinterest. Dis baie inspirerend om te sien wat die res van die wêreld doen.

Het jy ’n leuse?

Haal asem. Wees gaaf met jouself en ander mense.

Wat is die mees opwindende ontwikkeling by Block & Chisel?

Om nuwe produkte reg oor die wêreld te vind, ons aanlyn en sosiale media ontwikkeling en ons nuwe webtuiste. En natuurlik ons plaaslik meubels wat ons hier in Kaapstad vervaardig.

Wat is jou mees gunsteling Block & Chisel meubelstuk?

Defnitief ons kombuis-eiland

Kombuis-eiland van R25 995
FOTO Block and Chisel

En wat is jou gunsteling vertrek in jou huis.

My kombuis. Ek was nog altyd ’n kombuis-mens, alles gebeur hier, alle kreatiwiteit, al die pret en onthaal vind hier plaas.

FOTO: Instagram @taylankumelii

Gesondheidstories

15 simptome van menopouse

Hoe weet ek dis my oorgangsjare?

’n Volledige mediese geskiedenis isdie beste manier om uit te vind. Hou dagboek wanneer jy menstrueer en van enige simptome – en bespreek dit met jou dokter. Bloedtoetse kan gedoen word om die vlakke van estrogeen- en follikel-stimulerende hormone (FSH) te bepaal. Maar ’n akkurate toetsing is moeilik omdat hormoonvlakke in die oorgangsjare baie wissel, sê Nicole Jaff, gesertifiseerde menopouse- konsultant by die Amerikaanse menopouse-vereniging, in haar boek Menopouse: Die volledige gids (Penguin, 2008). Dis uit druk, maar haar jongste boek, Menopause: Everything you need to know (Bookstorm, 2011), is in boekwinkels en word aanbeveel. Sy is ook besig met haar doktorale tesis oor die menopouse.

15 moontlike menopouse-simptome

1. Warm gloede
2. Nagsweet
3. Borsswelling en -teerheid
4. Lyfseer (veral seer gewrigte)
5. Lae libido
6. Verandering in urinêre funksie (bv. inkontinensie)
7. Gewigstoename
8. Vergeetagtigheid
9. Buierigheid
10. Angs
11. Veranderde slaappatrone
12. Hoofpyne/migraine
13. Ongereelde maandstonde
14. Velveranderinge (bv. minder elastisiteit)
15. Simptome wat swangerskap naboots: seer borste, moegheid, onbeheerste eetlus, tranerigheid

FOTO Unsplash

Boeke

Stukkende mense se verhaal roer

Arundhati Roy se jongste boek is met groot lawaai bekend gestel en word beskryf as ’n monumentale nuwe roman. Maar in haar boek beskryf sy haar verhaal as stukkend.

Op die agterkant van The Ministry of Utmost Happiness (Penguin, R295)
word hierdie aanhaling uit die boek weergegee: “How to tell a shattered story? By slowly becoming everybody. No. By becoming everything.”

FOTO: verskaf

En wanneer jy die boek lees, besef jy dis werklik ’n stukkende storie oor stukkende mense in ’n stukkende land. Daar is ongelooflik baie karakters waarmee jy moet kop hou. Boonop is die verhaal nie chronologies geskryf nie. Dis geweldig gefragmenteerd. Daar is verwysings na Indië se kastestelsel, die deurmekaar politiek van die land, armoede, die versugting na moederskap, aanvaarding en liefde. Daar is hoofsaaklik twee verhaallyne. Die een gaan oor Anjum, ’n transgender mens, en die ander een oor Tilo, ’n baie stekelrige politieke aktivis en die drie mans wat verlief is op haar. As jy hou van ’n definitiewe struktuur in ’n verhaal, dan sal hierdie boek jou frustreer. Maar as jy nie omgee vir die chaos nie, dan sal jy mal wees oor die boek wat deurspek is met stukkies poësie, filosofiese uitdrukkings en eksentrieke karakters. Roy het ’n ongelooflike mooi manier om in baie min woorde ’n hele toneel vas te vang, met soveel emosie dat jy wil huil daarvan.

Ná die lees van die verhaal het ek besef dat daar lande en nasies is wat heeltemal anders is en wie se kultuur en tradisies steeds ’n diep invloed op die gemeenskap het. Ek het ook besef dat politiek ’n lelike dier is, veral in die gedaante waarin hy in Roy se verhaal voorkom. Die karakters het my aangegryp en ek het saam met hulle gelag en gehuil. Die boek sal nie in almal se smaak val nie, maar vir hierdie leser was dit ’n uitsonderlike leeservaring. – Phyllis Green

FOTO: verskaf

Dear Amy, Helen Callaghan (Penguin Books, R250)
Ek kon aanvanklik nie vat kry aan hierdie boek nie ten spyte van die prikkelende stukkie op die agterblad wat my gelok het om die boek te lees. Margot Lewis is die plaaslike koerant se agony aunt wat raad uitdeel aan al die briefskrywers. Sy kry allerhande soorte briewe, maar dan kry sy op ’n dag briewe van Bethan Avery wat al vir jare vermis word. Sy pleit by Margot om haar te help om te ontsnap van die man wat haar gevange hou. Maar is die briewe regtig van Bethan af? Dit lyk so, want die inligting daarin is baie geloofwaardig. Margot se obsessie is om Bethany op te spoor. Die verhaal het my plek-plek verloor, omdat sommige van die gebeure onrealisties was. Tog is dit ’n leesbare verhaal met ’n interessante kinkel aan die einde. – Phyllis Green

FOTO: verskaf

Drieklawerblaar, Christine Barkhuizen-le Roux (Human & Rousseau, R275)
In Drieklawerblaar word die stories vertel van Kate Jooste, ’n afgetrede verpleegster, Tinneke le Grange, ’n weduwee en gastehuiseienaar, en Tinneke se hardkoppige buurman, Abel Marais.
Kate boek haarself by Tinneke se gastehuis in met die doel om klarigheid te kry oor haar verlede. Hoe het haar Ierse ouma dit gehou hier in die dorre landskap en wat was die oorsaak van haar ma en ouma se moeilike verhouding? Tinneke worstel om haar man se dood te verwerk, hoewel hulle eintlik lank voor sy dood al vir mekaar “dood” was.  Net soos Kate en Tinneke is Abel op soek na vergelding vir onregte wat gepleeg is teen sy familie.
Elkeen van hierdie mense dra swaar aan sy eie storie.  Hul paaie loop onafhanklik van mekaar, maar hul behoefte om die verlede agter te laat en ’n skoon toekoms tegemoet te gaan, verweef hul lewens en bring hulle bymekaar uit.
In die afluitingswoorde van Iyanla Vanzant word die boodskap van die boek baie duidelik oorgedra:  “forgiveness is giving up the hope that the past could be any different.” – Alma Liebenberg

FOTO: verskaf

Foxtrot van die liefde, Kristel Loots (Lapa Uitgewers, R240)
Katalaya se tragiese dog opbeurende verhaal sal veral by ouer vroue resoneer wat hul eie verliese, begeertes en probleme daarin sal herken. Loots se verhaal is egter ook deurspek met humor en is vars en modern aangebied.

Katalaya is sestig, maar sy trek funky aan en kleur haar hare platinumblond. Byderwets wil sy wees en sy moet hanteer dat haar man haar vir ’n jonger blondine gelos het, dat haar kinders wegdryf en dat haar ma demensie het, met net hier en daar helder oomblikke. Hoewel oorgewig, smag Katalaya boonop om weer ’n man in haar lewe te hê. Geheime word ontrafel en ’n jeugliefde verskyn. Word ’n vrou ooit te oud om weer lief te hê? Sal Katalaya nog die foxtrot van die liefde kan dans?Malene Breytenbach

FOTO: verskaf

Landline, Rainbow Rowell (Orion, R205)
’n Genotvolle, ligte roman oor ’n egpaar met twee kinders en huweliksprobleme. Georgie McCool is ’n televisieskrywer wat haar gesin se versorging aan haar man oorlaat vanweë ’n veeleisende beroep.

Neal en die dogters vertrek sonder haar om Kersfees by sy ma in Omaha deur te bring.

Die kruks van die roman draai om Georgie se ouerhuis, waar sy tyd spandeer. In haar kamer is ’n geel telefoon wat Neal antwoord soos vroeër, al ignoreer hy haar oproepe na sy selfoon.

Georgie se aantreklike kollega, Seth, geniet dit om Neal te beledig. Georgie is bereid om saam te lag, al dink sy dat Seth hom net nie verstaan nie.

Moderne tegnologie word gebrandmerk as lastig, want Georgie se ou geel telefoon is waardevol, terwyl selfone haar en Neal nie verbind nie. Sy reageer ook negatief wanneer haar suster ’n tabletrekenaar vra.  – Mariette Postma

FOTO: verskaf

My name is Lucy Barton, Elizabeth Strout (Penguin Random House, R285)
Hierdie roman oor die kompleksiteit van die verhouding tussen ma en dogter gryp mens aan die hart. Lucy se ma kan net sê dat sy haar liefhet wanneer Lucy se oë toe is, maar sy verstaan dit: “It was allright”.

Daar is ’n paar verwysings na Lucy se vrees vir “the thing”, met die suggestie van ’n seksuele afwyking wat hulle as kinders getraumatiseer het.

Mens lees hoe hulle sosiaal verstoot is weens die gesin se geestelike en fisiese armoede. Lucy het haarself hieruit gelig, anders as die ander twee kinders in die gesin en ly geen finansiële gebrek meer nie.

In die derde week van haar onverstaanbare siekte, verskyn haar ma eendag langs die hospitaalbed. Dan volg vyf nagte van rustigheid vir Lucy wie se ma pal by haar sit en haar emosionele nood verlig met stories uit haar kinderdae. Ma en dogter leer mekaar uiteindelik ken en gesels oor die verlede en Lucy se nuwe lewe.

Dié outeur het ook die verfilmde Olive Kitteridge geskryf met dieselfde diepte en gebrek aan sentimentaliteit.  – Mariette Postma

FOTO: verskaf

Trapped, Sam Scarborough (Human & Rousseau, R240)
Baie van ons droom daaroor om die liefde van ons lewe op ’n onverwagse manier te ontmoet. Hollywood wakker hierdie begeerte aan deur rolprente waar die held en heldin teen die einde in mekaar se arms val en dan vir altyd daarna sonder enige konflik gelukkig voortleef.
Sam Scarborough bevind haarself in’n sprokie wanneer haar Engelse prins in ’n wit vliegtuig by die Kaapstadse lughawe land. Soos hy aangestap kom, weet sy dat hy die een vir haar is. Hulle het deur ’n kennis ontmoet en die liefdesvlamme is dadelik aangewakker. Hulle geniet die wonderlikste paar dae saam en as hy moet teruggaan Engeland toe, besef hulle dat die verhouding reeds ernstig is en dat dit vir hulle uitdagend sonder mekaar sal wees.
Soos in ’n Hollywood-fliek, besluit Sam om tog haar prins se uitnodiging na Londen te aanvaar. Sy tref al die reëlings en trek sak en pak, haar dogter ingesluit, in sy woonstel in Notting Hill in. Sam glo dat sy gereed is vir die groot lewensverandering wat voorlê. Die eerste week is alles waaroor sy nog altyd gedroom het.
Hierdie verhaal, in die vorm van ’n dagboek wat Sam gehou het, laat jou hare rys. Die persoonlike aanslag gee die boek ’n pynlik eerlike invalshoek. Met al die voordele wat saam met nawete gaan, kan Sam terugkyk op haar tyd in Londen. Sy erken dat om van verbale en emosionele mishandeling te ontsnap, vat net soveel waagmoed as enige ander vorm van mishandeling. – Antoinique van Staden

FOTO: verskaf

Britt-Marie was here, Fredrik Backman (Atria Books, R180)
Van dieselfde skrywer van A Man Called Ove, Fredrik Backman, kom die storie van Britt-Marie. Die skaam en teruggetrokke Britt-Marie staan vir die eerste keer in haar lewe op vir haarself: sy kry ’n werk en trek weg van haar ongelukkige huwelik en eentonige bestaan. Haar man en almal wat sy ken, sien haar as ’n sosiaal wanaangepaste perfeksionis vol nukke, maar sy vind ’n dorpie waar sy welkom voel. Die inwoners aanvaar haar en sy voel sy het ’n doel.  Haar lewe verander handomkeer en selfs haar man begin met nuwe oë na haar kyk. Dit is ’n deernisvolle storie en Britt-Marie kruip sommer diep in mens se hart in.  – Danica Gouws

 

FOTO: verskaf

A Place called winter, Patrick Gale (Headline, R195)
Niemand kon ooit vir die skrywer, Patrick Gale, duidelikheid gee hoekom sy grootjie vroeg in die twintigste eeu skielik sy vrou en kind in Engeland verlaat het om ’n boer in die ongerepte dele van die pas gekolonialiseerde Kanada te word nie.

Dus, skep Gale in sy nuwe boek, A Place Called Winter, ’n fiktiewe verhaal wat moontlik hierdie misterie vir die familie kan verduidelik: Harry Cane word verplig om sy gesofistikeerde leefstyl en al sy geliefdes in Engeland agter te laat toe hy in ’n onwettige seksuele verhouding betrap word. So begin sy fisiese reis na Kanada, maar ook die reis in homself waar hy alles verloor, maar ware liefde vind en homself vir die eeste keer ontdek. – Danica Gouws

 

FOTO Moira West Photography

Bruid

SARIE se Bruidspaar van die Jaar 2016/’17

Nicholaas & Chandré Lerm sê:Ons troudag was werklik die beste dag van ons lewe. Dit is die onbeskryflikste gevoel van ’n geseënde dag – ’n ervaring van soveel liefde en omgee vir mekaar. Ons mooiste herinnering is die oomblik toe ek aan die sy van my pa in die paadjie afgestap gekom het en my man nie sy trane kon keer nie – oorstelp van vreugde en trots. Dit was liefde wat nie in woorde uitgedruk kan word nie en ons vir ewig sal bybly. Die pragtige onthaalsaal het groot glasskuifdeure gehad wat die laatmiddagson deur groen varings ingelaat het. Buite in die tuin het die agapante en gaura geroer in ’n ligte somerswind wat met dankbaarheid ontvang is op die mooie somersdag. Ons troudag was perfek, net soos ons daaroor gedroom het.”

FOTO Moira West Photography

Wat sê die SARIE-span?

Michélle van Breda, SARIE-redakteur, sê: “Hierdie paartjie is vir my die toonbeeld van perfeksie! Haar trourok, sy troupak, haar verruklike blomme, sy lapelblom . . . alles werk net. Duidelik het hulle styl, en soos die jare aanstap, sal hulle weer en weer na die foto’s kan kyk en sê: Dit was ons perfekste en gelukkigste dag!”

Amaria Carstens, SARIE-moderedakteur: “Die delikate bodeel van Chandré se rok pas haar fyn bou perfek. Minimale bykomstighede het haar ongelooflike rok nog meer laat uitstaan.”

Pieter Hugo, SARIE-projekbestuurder: “Chandré se rok en Nicholaas se troupak is in die kol met klassieke wit-en-swart, met skakerings van pienk en marsala daarby. Haar spleetromp beweeg pragtig en is gepas vir so ’n mooi jong bruid.”

FOTO Moira West Photography

FOTO Moira West Photography

FOTO Moira West Photography

Onthaalplek: Belair, Paarl

Troudatum: 12 Desember 2016

Die paartjie: Chandré (Poulton), 25 van Mariental, Namibië, Arbeidsterapeut

Nicholaas, 31 van Jeffreysbaai, tans ’n skeepsdokter op die Majestic Princess

Sy pak: Fabiani

Haar rok: Didi Couture

Strooimeisies se rokke: Jacoba Clothing

Grimeerkunstenaar: Corlé Barnard