Jani aartappel stensil
Maak dit self

Jani se DIY-blog: Die eenvoudige aartappel-stensil op sy beste

Jani Goussard van Paint & Decor deel haar nuutste projekte met SARIE.com en wys jou stap vir stap hoe om dit sélf te doen. Dié week wys sy hoe om baie mooi stensil-drukke met ’n eenvoudige aartappel te doen. 

Druk jou stempel af

Soms is die eenvoudigste dinge in die lewe regtig die moeite werd om weer te probeer! Terwyl ek tafels vir ons koffiewinkel geverf het, het ek met verskeie dekoratiewe verftegnieke eksperimenteer. Ek het die goeie ou aartappelstensil-tegniek weer op die proef gestel en ek is mal daaroor! Dit is só maklik en doeltreffend. Die geheim is om die ontwerp en kleure modern te hou.

Jani aartappel stensil

Jy benodig

  • Lekker groot vars aartappels
  • Koekie-uitdrukkers met interessante patrone
  • ’n Skerp, klein kombuismessie
  • PVA-verf (ek beveel aan Annie Sloan Chalk Paint™)
  • ’n Tafel om te stensil (of sommer net papier om jou eie geskenkpapier van te maak!)

Stap 1: Voorbereiding

Koop lekker groot, ferm aartappels om mee te werk. Besluit watter kleure jy vir jou stensil-tegniek wil gebruik.

Jani aartappel stensil

Verf die tafel of basis waarop jy wil stensil in die kleur van jou keuse.

Stap 2: Drukwerk

Sny die aartappels in die middel deur. Soek vir jou ’n paar oulike koekiedrukkers. Jy kan ook enige patroon of letter met ’n messie vryhand uit die aartappel sny.

Druk die koekiedrukker redelik diep in die aartappel, omtrent so 6 mm.

Stap 3: Kerf af

Sny met ’n skerp kombuismessie die buitenste dele van die aartappel rondom die koekiedrukker se patroon uit.

En jy het jou eerste stensil gemaak! Deesdae is daar die mooiste koekiedrukkers waarmee jy maklik interessante stensils kan maak.

Stap 4: Verf en stensil

Druk die aartappel-stensils op ’n absorberende lappie om dit droog te maak. Jy kan ook die aartappels bietjie laat staan sodat dit effens uitdroog – hoe droër die aartappel, hoe duideliker sal die patroon wees.

Gebruik kleiner en groter patrone deurmekaar en speel lekker met kleur. Gebruik jou verbeelding en maak enige oppervlak pret met jou unieke stensils. Ek hou spesifiek van die tafel wat ek net half geverf het en toe met stensil-voëltjies verder versier het.

Hierdie is ’n maklike manier om stensils te maak, maar dit is baie lekker en werk goed!

Jani aartappel stensil Jani aartappel stensil Jani aartappel stensil Jani aartappel stensil

Mooi loop tot volgende keer!

Jani Goussard, 
Paint & Decor DIY
Volg ook Verbeelding.Image op Facebook vir nóg meer DIY-projekte of inligting oor werkswinkels.
 

Alle foto’s en inhoud se kopiereg lê by Jani Goussard, Paint & Decor DIY.

Jani se vorige blogs – klik HIER