6 c
Maak dit self

Jani se DIY-blog: Vinnige stoel ‘face-lift’

Jani Goussard van Paint & Decor deel haar nuutste projekte met SARIE.com en wys jou stap vir stap hoe om dit sélf te doen.

Ek is hopeloos te verlief op die voorkoms van ou hout om dit te verf, maar soms kort ’n ou stoel ’n bietjie ekstra detail. Hierdie is ’n baie maklike, vinnige projek om ’n mooi ou houtstoel of -tafel nuwe lewe te gee!

Jy benodig

  • ’n Houtstoel of -tafel
  • Liniaal
  • Bordkryt
  • Bladgoud (Gold Leaf)
  • Bladgoudgom (sizing)
  • 2 klein kwassies
  • Vernislak-vlokkies (Shellac-vlokkies by Paint & Décor in 50 g pakkies beskikbaar) opgelos in brandspiritus (methylated spirits)

 1. Voorbereiding

Was jou stoel mooi met suikerseep af sodat daar nie vuiligheid is nie. Enige stof sal keer dat die bladgoud daaraan kleef.

1

2. Beplan en meet

Bladgoudgom maak dit moontlik om met patrone te speel en selfs woorde te spel, omdat bladgoud slegs vasplak waar dié gom aangewend is. Daarom moet jy mooi beplan voordat jy met jou projek begin.

Ek gaan die onderkant van dié stoel se pote afmeet en vir hulle goue voete gee. Ek gaan ook druppels laat afloop sodat dit lyk asof die goud teen die stoel se poot ‘drup’.

Vir hierdie stap moet jy jou stoel omdraai sodat jy makliker by die pote kan uitkom. Meet 10 cm van elke poot se onderkant af en merk dit met bordkryt.

3. Patrone met gom 

Verf bladgoudgom om elke poot se onderkant tot teenaan die bordkrytstreep en laat ’n paar druppels afloop (die gom is redelik vloeibaar so jy kan net ’n druppel met jou kwas druk om af te loop).

Wag totdat die gom droog word. Wanneer die gom droog is, raak die wit vloeistof deursigtige en taai. Dís dan perfek om die bladgoud aan te wend.

4. Bladgoud

Wees baie versigtig met die aanwend van die bladgoud – die blaadjies waai sommer weg! Plaas die bladgoud stukkie vir stukkie met skoon, droë hande op die areas van die stoel waar jy die gom geverf het. Jy kan die velletjie mooi teen die hout met ’n droë kwassie platstryk en die dele afvee wat nie aan die gom raak nie.

5. Vernislak (Shellac)

Seël nou die bladgoud oral met vernislak. Dit is ’n produk wat al jare gebruik word vir dekoratiewe seëlwerk en het ’n pragtige, natuurlike diep glans. Dit word verkoop as vlokkies wat opgelos word in brandspiritus (methylated spirits) (in die verhouding 1:1).

Los die oplossing in ’n glashouertjie totdat die vlokkies heeltemal opgelos is en dit ’n goue, loperige voorkoms het. Wend die vernislak met ’n verfkwas oor die bladgoud aan. Dit verseker dat die goud nie verdof of beskadig nie. Jy kan twee lae vernislak aanwend. Was jou kwas ná die tyd met brandspiritus.

6. Klaar

En siedaar! Pronktyd met jou unieke stoel. Ek het ons stoel sommer in ons koffiewinkel in ons Stellenbosch-tak gebruik as ’n koekstander!

Lees ook